16
'Blʋa 'a 'fɔ ʋʋ poa soa' -wɛe ʋʋ "nyɩa Sosɛu 'a "nynuʋ nmai nynuu, ɛ tba 'de Sudɛn "i 'de Seriko -pʋn", 'de "kao -ɩa ja "ni 'de ɛɛ' "kwi -kwlɔ -tu 'di 'a 'jrʋ 'a 'wlʋʋ na' fɔo. Dɛ -tba' 'mʋa-, ɛ jiiɛ crʋ "kpei i 'de -pɩɩɔn" blʋa 'di -wɛe ɛ muu Betɛlɩ fɔo, 2 ɛ 'wlʋa Betɛlɩ ɛ mu 'sʋ ɛ nyni Lusɩ 'de ɛ cɛɛn Aki nyʋ 'a 'blʋa wɔin 'de Atarɔtɩ. 3 'Sʋ ɛ "siɛ i 'de Jafɛlɛtɩ -nyʋ 'a 'blʋa 'a 'jrʋ 'a blʋ 'ɩn fɔo -wɛe ɛ jɛɛ Bɛtɩ Orɔn 'de -sɔn 'ɔ 'blʋa 'a 'fɔ, 'de jɛɛ Kesɛɛ -nyʋ 'a 'blʋa 'a 'fɔ, ɛ poɛ "jru i 'de 'tɔniɛ nyʋ a 'daa Meditelane' wɔn. 4 'Blʋa 'a 'fɔ ʋʋ "nyɩa Sosɛu 'a "nynuʋ nmai nynuu Manase ke Eflaimʋ ke mɛ -nao.5 Eflaimʋ 'a -kwlin 'a 'kɛn ka: Ɛɛ' -paʋn tba Atarɔtɩ Adaa 'a 'jrʋ 'wlʋʋ 'ɩn fɔo -wɛe jɛɛ Bɛtɩ Orɔn 'de 'kwea, 6 -wɛe ɛ mu mamaʋ ɛ jɛɛ 'tɔniɛ. 'De 'kwea a, ɛ cɛɛn 'de Mikɩmetatɩ -wɛe ɛ "bie 'de Tanaatɩ Silo ɛ cɛan 'ʋn -tie" 'de Janoa 'a 'jrʋ 'a 'wlʋʋ 'ɩn, 7 Dɛ -tba' Janoa ɛ "siai 'de Atarɔtɩ ke Naalata, ɛ bla Seriko "i -wɛe ɛ "sii 'de Sudɛn -pʋn". 8 Dɛ -tba' Tapua a, ɛ muu 'de 'jrʋ 'a 'wlʋʋ 'ɩn fɔo 'de Kana 'a "ni 'a -cru -cru nʋ na' -wɛe ɛ jɛɛ 'tɔniɛ. Ka Eflaimʋ 'a 'blʋa 'a 'blowɔn 'ɔ -kwlin 'a 'kɛn nɩa 'ka -nao, 9 ɛ ke ɛɛ' "kwi -kwlɔ ke -kwlɔ ɛ 'blea -wɛe -ɩ -teea kpɔi" 'de Eflaimʋ 'a "nynuu 'a -tɩ' 'ʋn 'de Manase 'a 'blʋa 'a 'blowɔn 'kɛn "kwlu ɛ.
10 Eflaimʋ 'a 'cɛ se Kanaa nyʋ -tia" 'de Kesɛɛ 'ɛ ma" i -sa. Ʋʋpʋ "tiɛ 'de Eflaimʋ -nyʋ "kwlu -wɛe ʋʋ nɩ ʋʋpʋ 'a "plɔɔ -sɩan ke.